Stampi u regoli ta’ riproduzzjoni

L-użu ta’ xbihat ta’ karti tal-flus tal-euro

Tista’ tuża xbihat tal-karti tal-flus tal-euro mingħajr awtorizzazzjoni minn qabel diment li tikkonforma mar-regoli tal-BĊE dwar ir-riproduzzjoni tal-karti tal-flus (ara b’mod partikolari l-Artikolu 2 tad-Deċiżjoni BĊE/2013/10). 

Dawn ir-regoli jiżguraw li l-pubbliku ġenerali ma jitqarraqx bir-riproduzzjonijiet u jaħsibhom karti tal-flus ġenwini. B’dan il-mod, nistgħu niżguraw li l-karti tal-flus tal-euro jibqgħu mezz ta’ ħlas affidabbli u sikur.

Kundizzjonijiet għall-użu

Jekk tixtieq tuża xbihat tal-karti tal-flus tal-euro, għandek iżżomm mar-regoli dwar ir-riproduzzjoni stabbiliti fid-Deċiżjoni BĊE/2013/10. Permezz tar-riproduzzjoni nfissru kull rappreżentazzjoni fiżika jew diġitali li tuża karta tal-flus tal-euro kollha jew partijiet minnha jew partijiet mill-elementi tad-disinn individwali tagħha. Ir-riproduzzjonijiet li jikkonformaw mal-kriterji stabbiliti fl-Artikolu 2 tad-Deċiżjoni BĊE/2013/10 huma meqjusa legali, peress li ma hemm l-ebda riskju li l-pubbliku ġenerali jista’ jitfixkilhom ma’ karti tal-flus tal-euro ġenwini.

Jekk jogħġbok irreferi għad-Deċiżjoni BĊE/2013/10 għal deskrizzjoni sħiħa tal-kriterji rilevanti. Spjegazzjoni qasira tal-kriterji hija pprovduta hawn taħt.

Ir-riproduzzjonijiet li ma jikkonformawx mar-regoli rilevanti huma kkunsidrati bħala illegali. Min jirriproduċi karta tal-flus huwa personalment responsabbli biex jiżgura li r-riproduzzjoni tissodisfa l-kriterji stabbiliti fid-Deċiżjoni BĊE/2013/10.

Għal aktar informazzjoni, ara d-dokumenti elenkati hawn taħt, jew agħti daqqa t’għajn lejn il-Mistoqsijiet frekwenti tagħna, fejn inwieġbu wħud mill-aktar mistoqsijiet komuni dwar ir-regoli dwar ir-riproduzzjoni tal-karti tal-flus.

• Deċiżjoni tal-Bank Ċentrali Ewropew tad-19 ta' April 2013 dwar id-denominazzjonijiet, l-ispeċifikazzjonijiet, ir-riproduzzjoni, it-tisrif u l-irtirar tal-karti tal-flus tal-euro (BĊE/2013/10), ĠU L 118, 30.4.2013, p. 37.
• Linja Gwida tal-Bank Ċentrali Ewropew tal-20 ta' Marzu 2003 dwar l-infurzar ta' miżuri kontra r-riproduzzjoni tal-karti tal-flus euro irregolari u dwar il-bdil u l-irtirar tal-karti tal-flus tal-euro (BĊE/2003/5), ĠU L 78, 25.3.2003, p. 20.
• Linja Gwida tal-Bank Ċentrali Ewropew tad-19 ta' April 2013 li temenda l-Linja Gwida BĊE/2003/5 dwar l-infurzar ta' miżuri kontra riproduzzjonijiet mhux konformi ta’ karti tal-flus tal-euro u dwar il-bdil u l-irtirar tal-karti tal-flus tal-euro (BĊE/2013/11), ĠU L 118, 30.4.2013, p. 43.
  

Prevenzjoni tal-użu illegali ta' xbihat diġitali tal-karti tal-flus

Il-Grupp tal-Banek Ċentrali li Jiskoraġġixxi l-Iffalsifikar tal-Flus (Central Bank Counterfeit Deterrence Group - CBCDG) – grupp internazzjonali ta’ aktar minn 35 bank ċentrali u awtorità tal-istampar tal-karti tal-flus, li l-banek ċentrali kollha tal-Eurosistema u l-Bank Ċentrali Ewropew huma membri tagħhom – huwa responsabbli għall-iżvilupp ta’ teknoloġiji li jipprevjenu l-użu ta’ kompjuters personali, tagħmir għall-immaġni diġitali u software għall-produzzjoni ta’ karti tal-flus foloz.

Din is-sistema ġiet adottata volontarjament minn bosta produtturi tal-hardware u tas-software. Twaqqaf lill-kompjuters personali u lill-għodda tax-xbihat diġitali milli jaqbdu jew jirriproduċu x-xbieha ta’ karta tal-flus protetta. Fi kliem ieħor, apparat tal-istampar jew tal-iskannjar jew għodda tax-xbihat diġitali li jinkorporaw din is-sistema ma jħallux awtomatikament li x-xbihat tal-karti tal-flus jiġu kkupjati jew stampati.

It-teknoloġija ma tistax issegwi l-użu ta’ kompjuter personali jew għodod ta’ immaġni diġitali. Jekk jogħġbok żur is-sit web tas-CBCDG għal aktar tagħrif dwar is-CBCDG u kif pajjiżi oħra jirregolaw l-użu tax-xbihat tal-karti tal-flus.

Tista' tikseb immaġini b'riżoluzzjoni għolja tal-karti tal-flus tal-euro (300 tikka kull pulzier (dpi)) għal skopijiet professjonali u esklussivament għar-riproduzzjoni fiżika tal-karti tal-flus tal-euro. Jekk jogħġbok innota li dawn l-immaġnijiet se jinkludu wkoll il-marka “specimen”. Biex titlobhom, ibgħat email lil Euro-Banknotes-Images@ecb.europa.eu fejn tispjega l-interess professjonali u leġittimu tiegħek fl-istampi.

Jekk jogħġbok ipprovdi wkoll dan li ġej:

• Isem u dettalji ta’ kuntatt
• Dettalji tal-attivitajiet ta’ negozju
• Indirizz tas-sit web tal-kumpanija
• Tagħrif dwar kif beħsiebek tuża x-xbihat

Wara li neżaminaw it-talba tiegħek nitolbuk timla u tibgħat dikjarazzjoni ta’ kunfidenzjalità li trid tiġi ffirmata minn rappreżentant awtorizzat tal-kumpanija tiegħek. Aħna nipprovdu sett ta’ stampi tad-denominazzjonijiet kollha disponibbli tas-sensiela Europa f’riżoluzzjoni ta’ 300 dpi u Tag Image File Format (TIFF), immarkati “specimen”.

Regoli dwar ir-riproduzzjoni tal-muniti tal-euro

Huma dawk il-medalji u tokens li ma jistgħux jiġu mħallta ma' muniti ġenwini tal-euro biss li jistgħu jiġu prodotti. Oġġetti metalliċi oħrajn li għandhom il-kliem “euro” jew “euro ċenteżmu”, jew dawk li juru disinn simili għad-disinn tal-muniti tal-euro, jistgħu faċilment jiġu konfużi mal-muniti ta’ valuta legali.

Għal tagħrif dwar ir-regoli dwar ir-riproduzzjoni tal-muniti tal-euro, jekk jogħġbok żur is-sit web tal-Kummissjoni Ewropea jew ikkuntattja lil waħda mill-awtoritajiet nazzjonali kompetenti tal-pajjiżi individwali taż-żona tal-euro.

Għad-dettalji, ara r-regolamenti elenkati hawn taħt.

• Regolament tal-Kunsill (KE) Nru 2182/2004 tas-6 ta' Diċembru 2004 dwar midalji u tokens simili għall-muniti tal-euro
• Regolament tal-Kunsill (KE) Nru 2183/2004 as-6 ta' Diċembru 2004 li jestendi għall-Istati Membri mhux parteċipanti l-applikazzjoni tar-Regolament (KE) Nru 2182/2004 dwar midalji u tokens simili għall-muniti tal-euro.