Mistoqsijiet frekwenti dwar id-disinn mill-ġdid tal-karti tal-flus tal-euro

Aġġornat fil-15 ta’ Lulju 2025

M1 Għaliex għandna bżonn karti tal-flus ġodda?

Il-banek ċentrali kollha regolarment itejbu l-karti tal-flus tagħhom jew jiżviluppaw oħrajn ġodda biex jiskoraġġixxu lill-falsifikaturi. L-ewwel serje ta’ karti tal-flus tal-euro ddaħħlet aktar minn 20 sena ilu u t-tieni serje bdiet tidħol fiċ-ċirkolazzjoni fl-2013. Issa ninsabu fil-proċess li niżviluppaw il-karti tal-flus tal-euro għall-futur. Din hija opportunità biex isiru wkoll aktar attraenti, relatabbli u inklużivi għall-Ewropej kollha, inklużi persuni b’vista batuta.

Irridu wkoll li l-karti tal-flus tal-euro jkunu kemm jista’ jkun sostenibbli u jibżgħu għall-ambjent, u għalhekk qed inħarsu lejn opportunitajiet biex innaqqsu l-impatt ambjentali tagħhom.

M2 Għaliex għandna bżonn ta’ disinn ġdid għall-karti tal-flus?

Il-karti tal-flus tal-euro huma simbolu viżibbli u tanġibbli tal-integrazzjoni Ewropea u hija r-responsabbiltà tagħna li nżommuhom aġġornati. Aktar minn 20 sena wara l-introduzzjoni tal-ewwel karti tal-euro, issa qegħdin nirrieżaminaw id-disinn tagħhom bħala parti mill-proċess tal-iżvilupp regolari. B’mod konformi mal-istrateġija tal-Eurosistema dwar il-flus kontanti, nimmiraw li niżviluppaw karti tal-flus tal-euro attraenti li ċ-ċittadini Ewropej jistgħu jidentifikaw magħhom.

M3 Għaliex issa? Dan huwa ż-żmien it-tajjeb biex tiġi żviluppata serje ġdida ta’ karti tal-flus?

Iridu jgħaddu bosta snin biex jiġu żviluppati u prodotti karti tal-flus ġodda u biex dawn jiddaħħlu fiċ-ċirkolazzjoni fiż-żona tal-euro kollha. Il-karti tal-flus ġodda normalment jitqiegħdu fiċ-ċirkolazzjoni kull għaxar snin sa ħmistax-il sena biex itejbu s-sigurtà u r-reżistenza u jibqgħu aktar avvanzati mill-falsifikaturi. Huwa importanti li l-proċess jinbeda kmieni biżżejjed biex inkunu lesti ladarba tittieħed deċiżjoni biex titnieda serje ġdida.

M4 Kif jaħdem il-proċess tad-disinn mill-ġdid tal-karti tal-flus il-ġodda?

Id-disinn mill-ġdid tal-karti tal-flus tal-euro jikkonsisti f’żewġ fażijiet konsekuttivi:

1. L-għażla ta' temi u motifi futuri għall-karti tal-flus tal-euro.
   1. Aħna kkummissjonajna studju biex nikkonsultaw liċ-ċittadini Ewropej fi gruppi fokali dwar il-fehmiet tagħhom dwar temi futuri possibbli. Ir-riżultati servew bħala input għall-passi sussegwenti.
   2. Il-Kunsill Governattiv tal-BĊE għażel seba’ temi, inklużi sitt proposti mill-Grupp Konsultattiv dwar it-Temi (grupp ta’ esperti nnominati mill-banek ċentrali nazzjonali tal-Eurosistema u maħtura mill-BĊE).
   3. Iċ-ċittadini Ewropej ingħataw l-opportunità li jesprimu l-opinjonijiet tagħhom dwar is-seba’ temi magħżula fi stħarriġ li sar minn kumpanija tar-riċerka esterna fil-pajjiżi kollha taż-żona tal-euro kif ukoll fi stħarriġ online li sar mill-BĊE.
   4. Mil-lista l-qasira, il-Kunsill Governattiv għażel żewġ temi possibbli għall-karti tal-flus futuri, wara li kkunsidra r-riżultati tal-istħarriġ.
   5. Imbagħad, il-Kunsill Governattiv tal-BĊE għażel motifi biex juri t-temi possibbli mill-proposti żviluppati mill-Grupp Konsultattiv dwar il-Motifi (grupp ta’ esperti stabbilit mill-BĊE).
2. L-iżvilupp ta’ disinji ġodda għall-karti tal-flus tal-euro
   1. Wara li l-Kunsill Governattiv tal-BĊE għażel it-temi u l-motifi ġodda possibbli, tnieda konkors tad-disinn.
   2. Iċ-ċittadini Ewropej se jingħataw l-opportunità li jesprimu l-opinjonijiet tagħhom dwar għadd ta’ disinji fl-2026.
   3. Il-Kunsill Governattiv huwa mistenni jiddeċiedi dwar id-disinn il-ġdid tard fl-2026.

Għal aktar informazzjoni agħti ħarsa lejn il-paġna web tal-proċess tad-disinn mill-ġdid.

M5 Għaliex għażiltu “Kultura Ewropea” u “Xmajjar u għasafar” bħala t-temi possibbli għall-karti tal-flus futuri?

Qegħdin nisimgħu l-fehmiet taċ-ċittadini Ewropej matul il-proċess kollu tat-tfassil mill-ġdid. It-temi ntgħażlu abbażi tas-sejbiet tal-istħarriġiet pubbliċi (ara l-Mistoqsija 11) u bl-għajnuna ta’ grupp konsultattiv indipendenti.

Ir-riżultati tal-aħħar stħarriġ tagħna wrew appoġġ qawwi għat-temi ta’ “Il-Kultura Ewropea”, “Ix-xmajjar: l-ilmijiet tal-ħajja fl-Ewropa" u “L-għasafar: ħielsa, reżiljenti, ta’ ispirazzjoni”. Sabiex jirrifletti l-preferenzi tal-pubbliku b’mod kemm jista’ jkun wiesa’, il-Kunsill Governattiv iddeċieda li jikkombina t-temi relatati man-natura u mal-ambjent f’tema waħda, “Xmajjar u Għasafar”. Għalhekk se mmexxu biż-żewġ temi: “Kultura Ewropea” u “Xmajjar u Għasafar”.

M6 Kif iddeċidejtu dwar il-motifi għall-karti tal-flus futuri?

Fl-2024, il-BĊE qabbad lil grupp ta’ esperti indipendenti, il-Grupp Konsultattiv dwar il-Motifi, biex jipproponi motifi li juru bl-aħjar mod it-temi magħżula. Il-membri tal-Grupp huma esperti fuq suġġetti varji relatati maż-żewġ temi. Fil-bidu tal-2025, abbażi tal-parir tal-Grupp u d-deliberazzjonijiet personali tiegħu, il-Kunsill Governattiv iddeċieda li jinkludi ż-żewġ temi magħżula u sett ta’ motifi għal kull wieħed minnhom fil-konkors tad-disinn.

M7 X’inhi l-iskeda ta’ żmien għall-konkors tad-disinn?

Il-konkors tad-disinn, li tnieda fil-15 ta’ Lulju 2025, se jkun f’żewġ fażijiet.

1. Fl-ewwel fażi, id-disinjaturi grafiċi li għandhom ir-residenza tagħhom fl-Unjoni Ewropea huma mistiedna jissottomettu l-applikazzjonijiet tagħhom sa 12:00 CET tat-18 ta’ Awwissu. L-applikanti kollha sejrin jiġu nnotifikati bir-riżultat tal-evalwazzjoni. L-għan huwa li jintgħażlu sa 40 disinjatur (20 għal kull tema).
2. Fit-tieni fażi, id-disinjaturi magħżula se jkollhom madwar ħames xhur biex jissottomettu l-proposti tad-disinn tagħhom għal valutazzjoni mill-Ġurija tal-Konkors tad-Disinn. Il-konkors se jikkonkludi bl-għażla mill-Ġurija tal-Konkors tad-Disinn ta’ massimu ta’ għaxar disinni (ħamsa għal kull tema).

Il-Kunsill Governattiv huwa mistenni li jieħu d-deċiżjoni finali fuq id-disinni sa tmiem l-2026, wara stħarriġ pubbliku.

M8 Min jista’ jipparteċipa fil-konkors tad-disinn u kif?

Il-konkors tad-disinn huwa miftuħ għal disinjaturi grafiċi residenti fl-Unjoni Ewropea li jissodisfaw il-kriterji tal-eliġibbiltà. Għal informazzjoni dettaljata dwar min jista’ jipparteċipa u kif, jekk jogħġbok irreferi għad-dokumentazzjoni uffiċjali tal-konkors.

M9 Kif intgħażlu l-membri tal-gruppi ta’ esperti differenti?

Biex jgħinu fil-fażijiet varji tal-proċess ta’ disinn mill-ġdid, ġew stabbiliti tliet gruppi ta’ esperti indipendenti: il-Grupp Konsultattiv dwar it-Temi, il-Grupp Konsultattiv dwar il-Motifi u l-Ġurija tal-Konkors tad-Disinn. Dawn il-gruppi jikkonsistu minn speċjalisti minn madwar l-Ewropa, li jirrappreżentaw oqsma diversi bħad-disinn, l-istorja, il-litteratura, ix-xjenza, l-arti u l-akkademja, u jiżguraw firxa wiesgħa ta’ ħila u perspettivi. L-esperti ġew nominati minn banek ċentrali nazzjonali tal-Eurosistema u nħatru mill-Bank Ċentrali Ewropew.

M10 Meta se jkollna karti tal-flus b’disinn ġdid fil-bwiet tagħna?

Wara li jintgħażel id-disinn tal-karti tal-flus futuri tal-euro, il-Kunsill Governattiv tal-BĊE se jieħu deċiżjoni fuq meta se jipproduċi u joħroġ il-karti tal-flus il-ġodda. Se jgħaddu bosta snin biex l-ewwel karti tal-flus jidħlu fiċ-ċirkolazzjoni u jispiċċaw fil-bwiet tagħna.

Id-denominazzjonijiet differenti tas-serje attwali tal-karti tal-flus tal-euro ġew introdotti gradwalment fuq meda ta’ snin. S’issa għadha ma ttieħdet l-ebda deċiżjoni dwar meta u kif il-karti tal-flus tal-euro futuri se jiddaħħlu fiċ-ċirkolazzjoni.

M11 X’inhu r-rwol tal-pubbliku fil-proċess tat-tfassil mill-ġdid?

Iċ-ċittadini kollha taż-żona tal-euro jistgħu jieħdu sehem fl-istħarriġ pubbliku tagħna. Huwa importanti ħafna għalina li d-deċiżjonijiet meħuda matul il-proċess jirriflettu l-opinjonijiet ta’ firxa wiesgħa ta’ Ewropej.

Bdejna l-proċess bi stħarriġ kwalitattiv li sar fiż-żona tal-euro biex nifhmu l-opinjonijiet tan-nies dwar it-tema tal-karti tal-flus tal-euro futuri. Imbagħad, fis-sajf tal-2023, stedinna lill-pubbliku biex jieħu sehem fi stħarriġ online dwar temi possibbli. B’mod parallel, ikkummissjonajna kumpanija tar-riċerka esterna biex twettaq stħarriġ simili bl-għan li tiġi żgurata l-aħjar rappreżentanza possibbli tal-popolazzjoni taż-żona tal-euro.

Wara l-għażla tal-motifi u l-konkors tad-disinn, se nkejlu l-preferenzi tal-pubbliku fuq lista qasira ta’ disinji possibbli. Dan huwa mistenni li jsir fl-2026.

M12 Il-materjali jew id-daqs tal-karti tal-flus futuri se jinbidlu fil-proċess tad-disinn mill-ġdid u se jidhru denominazzjonijiet ġodda?

Il-karti tal-flus tal-euro attwali huma stampati fuq karta tal-fibra tal-qoton, li tagħtihom is-sodezza speċjali tagħhom u r-reżistenza għall-kedd. Qegħdin nesploraw kontinwament modi kif intejbu ċ-ċiklu tal-ħajja tal-karti tal-flus tagħna u nnaqqsu l-impronta ambjentali tagħhom.

Għandna l-intenzjoni li jkollna l-istess denominazzjonijiet bħas-serje attwali (€5, €10, €20, €50, €100 u €200). Biex niffaċilitaw il-bidla u nillimitaw l-ispejjeż tal-adattament tal-magni li jimmaniġġaw il-karta tal-flus, id-daqsijiet u l-kuluri dominanti huma mistennija wkoll li jibqgħu l-istess.

M13 Min se jiddeċiedi dwar it-tema u d-disinji finali?

Id-deċiżjoni finali se tittieħed mill-Kunsill Governattiv tal-BĊE, abbażi tal-fehmiet tal-pubbliku Ewropew u l-kontribut tal-gruppi ta’ esperti. Id-deċiżjonijiet tal-Kunsill Governattiv sejrin jitħabbru fuq il-websajt tal-BĊE.

M14 Gruppi vulnerabbli se jiġu kkonsultati matul il-proċess ta’ tfassil mill-ġdid (eż. persuni b’vista batuta)?

Il-BĊE u l-banek ċentrali nazzjonali tal-Eurosistema qegħdin f’kuntatt regolari ma’ gruppi kkonċernati diversi. Pereżempju, matul l-iżvilupp tas-serje tal-karti tal-flus tal-euro eżistenti, kellna konsultazzjonijiet regolari mal-Unjoni Ewropea tal-Għomja. Minn dak iż-żmien, dawn il-konsultazzjonijiet komplew u sejrin ikomplu tul il-proċess ta’ disinn mill-ġdid kollu.