KONFERENZA STAMPA

Christine Lagarde, President tal-BĊE,
Luis de Guindos, Viċi-President tal-BĊE

Frankfurt am Main, 30 ta’ Jannar 2024

Il-wara nofsinhar it-tajjeb, il-Viċi-President u jien nilqgħukom għal din il-konferenza stampa.

Il-Kunsill Governattiv illum iddeċieda li jnaqqas it-tliet rati ewlenin tal-imgħax tal-BĊE b’25 punt bażi. B’mod partikolari, id-deċiżjoni li titnaqqas ir-rata tal-faċilità tad-depożitu – ir-rata li permezz tagħha nidderieġu l-pożizzjoni tal-politika monetarja – hija bbażata fuq il-valutazzjoni aġġornata tagħna tal-prospettiva tal-inflazzjoni, id-dinamika tal-inflazzjoni sottostanti u s-saħħa tat-trażmissjoni tal-politika monetarja.

Il-proċess ta’ disinflazzjoni miexi sew kif ippjanat. L-inflazzjoni kompliet tiżviluppa kif imbassar fil-proġettazzjonijiet tal-persunal u matul din is-sena hija mistennija li tirritorna għall-mira tagħna fuq żmien medju ta’ tnejn fil-mija. Il-parti l-kbira tal-miżuri tal-inflazzjoni sottostanti jissuġġerixxu li l-inflazzjoni se tistabbilizza ruħha għal madwar il-mira tagħna fuq bażi sostnuta. L-inflazzjoni domestika tibqa’ għolja, l-aktar minħabba li l-pagi u l-prezzijiet f’ċerti setturi għadhom qed jaġġustaw ruħhom għaż-żieda f’daqqa fil-passat fl-inflazzjoni b’dewmien sostanzjali. Madankollu, iż-żieda fil-pagi qiegħda timmodera kif mistenni, u l-profitti qegħdin itaffu parzjalment l-impatt fuq l-inflazzjoni.

It-tnaqqis reċenti tagħna fir-rati tal-imgħax qiegħed gradwalment jagħmel is-self inqas għali għad-ditti u għall-unitajiet domestiċi. Fl-istess ħin, il-kundizzjonijiet tal-finanzjament għadhom stretti, anki minħabba li l-politika monetarja tagħna għadha restrittiva u ż-żidiet tal-passat fir-rati tal-imgħax għadhom qed jgħaddu għall-istokk tal-kreditu, b’xi self li qed jimmatura jiġi mgħoddi b’rati ogħla. L-ekonomija għadha qed tiffaċċja diffikultajiet iżda dħul reali li qed jiżdied u l-effetti li qegħdin jgħibu gradwalment ta’ politika monetarja restrittiva għandhom jappoġġaw irkupru fid-domanda maż-żmien.

Aħna ddeterminati li niżguraw li l-inflazzjoni tistabbilizza b’mod sostenibbli fil-mira tagħna ta’ 2 % fuq perjodu ta’ żmien medju. Se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospetti tal-inflazzjoni fid-dawl tad-data ekonomika u finanzjarja li tidħol, id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Id-deċiżjonijiet meħuda llum huma spjegati fi stqarrija għall-istampa disponibbli fis-sit web tagħna.

Issa se niddeskrivi f’aktar dettall kif naraw li se jiżviluppaw l-ekonomija u l-inflazzjoni, u mbagħad se nispjega l-valutazzjoni tagħna tal-kundizzjonijiet finanzjarji u monetarji.

Attività ekonomika

Skont il-kalkoli preliminari tal-Eurostat, fir-raba’ trimestru, l-ekonomija stgħaġnat. Hija mistennija li tibqa’ dgħajfa fuq żmien qasir. Sondaġġi jindikaw li l-manifattura qed tkompli tiċkien filwaqt li l-attività tas-servizzi qiegħda tespandi. Il-fiduċja tal-konsumaturi hija fraġli, u l-unitajiet domestiċi għadhom ma rabbewx biżżejjed fiduċja mill-introjtu reali li qed jiżdied biex iżidu l-infiq tagħhom b’mod sinifikanti.

Madankollu, il-kondizzjonijiet biex ikompli jkun hemm irkupru jibqgħu fis-seħħ. Filwaqt li s-suq tax-xogħol illaxka xi ftit tul dawn l-aħħar xhur, għadu b’saħħtu, bir-rata tal-qgħad tibqa’ baxxa, b’6.3% f’Diċembru. Suq tax-xogħol solidu u introjti ogħla għandhom isaħħu l-fiduċja tal-konsumaturi u jippermettu li l-infiq jiżdied. Kreditu aktar affordabbli għandu jsaħħaħ ukoll il-konsum u l-investiment maż-żmien. Dment li t-tensjonijiet fil-kummerċ ma jeskalawx, l-esportazzjonijiet għandhom jappoġġaw l-irkupru hekk kif id-domanda globali tiżdied.

Il-politiki fiskali u strutturali għandhom jagħmlu l-ekonomija aktar produttiva, kompetittiva u reżiljenti. Nilqgħu l-Kumpass tal-Kompetittività tal-Kummissjoni Ewropea, li jipprovdi pjan direzzjonali konkret għal azzjoni. Huwa kruċjali li l-proposti ta’ Mario Draghi biex tittejjeb il-kompetittività Ewropea u l-proposti ta’ Enrico Letta għat-tisħiħ tas-Suq Uniku jiġu segwiti, permezz ta’ politiki strutturali konkreti u ambizzjużi ulterjuri. Il-gvernijiet għandhom jimplimentaw l-impenni tagħhom skont il-qafas ta’ governanza ekonomika tal-UE b’mod sħiħ u bla telf ta’ żmien. Dan se jgħin biex jitnaqqsu d-defiċits fil-baġits u l-proporzjonijiet ta’ dejn fuq bażi sostnuta, filwaqt li jiġu pprijoritizzati riformi li jsaħħu t-tkabbir u l-investiment.

Inflazzjoni

F’Diċembru, l-inflazzjoni annwali żdiedet għal 2.4 fil-mija, b’hekk għoliet minn 2.2 fil-mija f’Novembru. Bħal ma ġara fix-xahrejn preċedenti, iż-żieda kienet mistennija u primarjament irriflettiet tnaqqis f’daqqa fil-passat fil-prezzijiet tal-enerġija li ma tqisux fil-kalkolu. Apparti ż-żieda xahar wara xahar f’Diċembru, dan wassal għal prezzijiet tal-enerġija kemxejn ogħla fuq bażi annwali, wara erba’ tnaqqisiet konsekuttivi. L-inflazzjoni tal-prezzijiet tal-ikel naqset kemxejn għal 2.6 fil-mija u l-inflazzjoni fl-oġġetti għal 0.5 fil-mija. L-inflazzjoni fis-servizzi żdiedet kemxejn għal 4.0 fil-mija.

Ħafna mill-indikaturi tal-inflazzjoni sottostanti qegħdin jiżviluppaw b’mod konformi ma’ ritorn sostnut tal-inflazzjoni lejn il-mira fuq żmien medju. L-inflazzjoni domestika, li tintraċċa mill-qrib l-inflazzjoni fis-servizzi, baqgħet għolja, hekk kif il-pagi u xi prezzijiet ta’ servizzi għadhom qed jaġġustaw ruħhom għaż-żieda fl-inflazzjoni tal-passat b’dewmien sostanzjali. Fl-istess ħin, sinjali reċenti jindikaw lejn moderazzjoni kontinwata fil-pressjonijiet fil-pagi u għar-rwol ta’ lqugħ li għandhom il-profitti.

Fuq perjodu ta’ żmien fil-qrib, nistennew li l-inflazzjoni tvarja madwar il-livell attwali tagħha. Imbagħad għandha tistabbilizza b’mod sostenibbli għal madwar il-mira fuq żmien medju ta’ 2 %. L-illaxkar fil-pressjonijiet tal-ispiża tax-xogħol u l-impatt kontinwu tal-issikkar tal-politika monetarja tagħna fuq il-prezzijiet tal-konsumaturi għandhom jgħinu dan il-proċess. Filwaqt li indikaturi bbażati fuq is-swieq ta’ kumpens għall-inflazzjoni fil-parti l-kbira tagħhom reġġgħu lura t-tnaqqis osservat fil-Ħarifa, ħafna mill-miżuri ta’ stenniji tal-inflazzjoni fuq żmien itwal jibqgħu stabbli għal madwar 2 fil-mija.

Valutazzjoni tar-riskji

Ir-riskji għat-tkabbir ekonomiku jibqgħu mxaqilba lejn it-tnaqqis. Aktar frizzjoni fil-kummerċ globali tista’ tkun ta’ piż fuq it-tkabbir taż-żona tal-euro billi tnaqqas l-esportazzjonijiet u ddgħajjef l-ekonomija globali. Inqas fiduċja tista’ tipprevjeni milli l-konsum u l-investiment jirkupraw b’rata mgħaġġla daqs kemm mistenni. Dan jista’ jkun amplifikat minn riskji ġeopolitiċi, bħall-gwerra mhux ġustifikata tar-Russja kontra l-Ukraina u l-kunflitt traġiku fil-Lvant Nofsani, li jistgħu jfixklu l-provvisti tal-enerġija u jkunu ta’ piż ulterjuri fuq il-kummerċ globali. It-tkabbir jista’ jkun ukoll aktar baxx jekk l-effetti mdewma tal-issikkar tal-politika monetarja jdumu aktar milli huwa mistenni. Jista’ jkun ogħla jekk il-kundizzjonijiet ta’ finanzjament aktar laxki u t-tnaqqis fl-inflazzjoni jippermettu li l-konsum domestiku u l-investiment jirkupraw aktar malajr.

L-inflazzjoni tista’ tkun ogħla jekk il-pagi jew il-profitti jiżdiedu b’aktar milli huwa mistenni. Ir-riskji ta’ żieda fl-inflazzjoni jirriżultaw ukoll mit-tensjonijiet ġeopolitiċi li qegħdin jiżdiedu, li jistgħu jgħollu l-prezzijiet tal-enerġija u l-ispejjeż tat-trasport tal-merkanzija fuq perjodu fil-qrib u jfixklu l-kummerċ globali. Barra minn hekk, l-avvenimenti ta’ temp estrem, u l-kriżi klimatika li qiegħda tiżvolġi b’mod aktar estiż, jistgħu jgħollu l-prezzijiet tal-ikel aktar milli huwa mistenni. B’kuntrast, l-inflazzjoni tista’ tkun aktar baxxa milli mistenni jekk il-fiduċja baxxa u t-tħassib dwar l-avvenimenti ġeopolitiċi jipprevjenu l-konsum u l-investiment milli jirkupraw malajr daqs kemm huwa mistenni, jekk il-politika monetarja trażżan id-domanda aktar milli huwa mistenni, jew jekk l-ambjent ekonomiku jmur għall-agħar b’mod mhux mistenni. Frizzjoni akbar fil-kummerċ globali tagħmel il-prospettiva tal-inflazjoni taż-żona tal-euro aktar inċerta.

Kundizzjonijiet finanzjarji u monetarji

Ir-rati tal-imgħax tas-suq fiż-żona tal-euro għolew mil-laqgħa ta’ Diċembru tagħna, parzjalment jirriflettu rati ogħla fis-swieq finanzjarji globali. Filwaqt li l-kundizzjonijiet ta’ finanzjament jibqgħu stretti, it-tnaqqis tagħna fir-rata tal-imgħax qiegħed iwassal biex gradwalment jagħmluha anqas għalja għad-ditti u għall-unitajiet domestiċi biex jissellfu.

Ir-rata tal-imgħax medja fuq self ġdid lil ditti naqset għal 4.5 fil-mija f’Novembru, filwaqt li l-kost tal-ħruġ tad-dejn ibbażat fuq is-suq baqa’ l-istess b’rata ta’ 3.6 fil-mija. Ir-rata medja fuq is-self ipotekarju ġdid naqset kemxejn għal 3.5 fil-mija.

It-tkabbir fis-self bankarju lil ditti żdied għal 1.5 fil-mija f’Diċembru, ogħla minn 1.0 fil-mija f’Novembru, fost fluss fix-xahar b’saħħtu. It-tkabbir fit-titoli ta’ dejn maħruġin minn ditti mmodera għal 3.2 fil-mija f’termini annwali. Is-self ipotekarju kompla jiżdied gradwalment iżda baqa’ mtaffi b’mod ġenerali, b’rata ta’ tkabbir annwali ta’ 1.1 fil-mija.

L-istandards tal-kreditu għal self lil negozji ssikkaw mill-ġdid fir-raba’ trimestru tal-2024, wara li kienu stabbilizzaw ruħhom mhux ħażin tul l-erba’ trimestri preċedenti, kif irrapportat fl-aktar stħarriġ reċenti tagħna dwar is-self bankarju. L-issikkar imġedded irrifletta prinċipalment il-fatt li l-banek qed isiru aktar imħassbin dwar ir-riskji li qed jiffaċċjaw il-klijenti tagħhom u huma inqas lesti li jieħdu riskji huma stess. Id-domanda għal self minn ditti żdiedet kemxejn fir-raba’ trimestru iżda baqgħet dgħajfa b’mod ġenerali. L-istandards tal-kreditu għas-self ipotekarju baqgħu fil-parti l-kbira tagħhom mhux mibdula, wara tliet trimestri ta’ llaxkar, filwaqt li d-domanda għal self ipotekarju żdiedet bis-saħħa l-aktar minħabba rati tal-imgħax aktar attraenti.

Konklużjoni

Il-Kunsill Governattiv illum iddeċieda li jnaqqas it-tliet rati ewlenin tal-imgħax tal-BĊE b’25 punt bażi. B’mod partikolari, id-deċiżjoni li titnaqqas ir-rata tal-faċilità tad-depożitu – ir-rata li permezz tagħha nidderieġu l-pożizzjoni tal-politika monetarja – hija bbażata fuq il-valutazzjoni aġġornata tagħna tal-prospettiva tal-inflazzjoni, id-dinamika tal-inflazzjoni sottostanti u l-qawwa tat-trażmissjoni tal-politika monetarja. Aħna ddeterminati li niżguraw li l-inflazzjoni tistabbilizza b’mod sostenibbli fil-mira tagħna ta’ 2 % fuq perjodu ta’ żmien medju. Se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja x-xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospetti tal-inflazzjoni fid-dawl tad-data ekonomika u finanzjarja li tidħol, id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nintrabtu minn qabel dwar xi direzzjoni partikolari għar-rati.

Fi kwalunkwe każ, aħna lesti li naġġustaw l-istrumenti kollha tagħna fi ħdan il-mandat tagħna biex niżguraw li l-inflazzjoni terġa’ lura għall-mira tagħna għal żmien medju u li nippreżervaw il-funzjonament bla xkiel tat-trażmissjoni tal-politika monetarja.

Issa ninsabu lesti biex inwieġbu l-mistoqsijiet tagħkom.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.