Pagamenti u titoli
Id-dmirijiet tal-Eurosistema
L-Eurosistema għandha d-dmir statutarju li tippromwovi l-operazzjoni bla xkiel tas-sistemi ta’ ħlas u tas-sistemi ta’ saldu (ara l-Artikolu 127(2) tat-Trattat dwar il-Funzjonament tal-Unjoni Ewropea u l-Artikoli 3 u 22 tal-Istatut tas-Sistema Ewropea ta’ Banek Ċentrali u tal-Bank Ċentrali Ewropew).
L-Eurosistema twettaq il-kompiti tagħha b’dan il-mod:
Tipprovdi faċilitajiet ta’ ħlas u ta’ saldu tat-titoli, billi topera sistema ta’ ħlas gross f’ħin reali għal ħlasijiet ta’ valur għoli bl-euro (T2), kif ukoll servizz pan-Ewropew (TARGET2-Securities, jew T2S) biex tippermetti lid-depożitarji ċentrali tat-titoli biex jissaldaw tranżazzjonijiet f’titoli bl-użu ta’ flus tal-bank ċentrali. L-Eurosistema tħaddem it-TARGET Instant Payment Settlement (TIPS) biex tissalda ħlasijiet bl-imnut instantanjament u 24 siegħa kull jum tas-sena. L-Eurosistema topera wkoll mekkaniżmu li jippermetti l-użu transfruntier tal-kollateral (CCBM), li se jiġi sostitwit mis-Sistema għall-Ġestjoni tal-Kollateral fl-Eurosistema (ECMS) lejn l-aħħar tal-2024. L-ECMS se tgħaqqad il-mod kif l-assi jintużaw bħala kollateral fl-operazzjonijiet ta’ kreditu tal-Eurosistema.
Din tistabbilixxi politiki ta’ sorveljanza u standards korrispondenti fir-rigward tas-sistemi ta’ pagament ta’ valur għoli, is-sistemi ta’ ħlas bl-imnut u l-istrumenti ta’ ħlas, is-sistemi tal-ikklerjar, is-sistemi ta’ saldu ta’ titoli u xi fornituri ta’ servizzi terzi. Tmexxi wkoll attivitajiet ta’ sorveljanza għall-infrastrutturi rispettivi tas-sistema, billi tevalwa l-konformità tagħhom mal-politiki u mal-istandards applikabbli u, fejn ikun meħtieġ, twassal għal tibdil.
Tistabbilixxi rekwiżiti biex ikun hemm kontinwità fix-xogħol tal-infrastrutturi tas-suq u tikkoordina l-ħidma ta’ implimentazzjoni.
Tissorvelja u, fejn ikun meħtieġ, tiżviluppa pożizzjoni dwar l-iżviluppi tas-suq u l-inizjattivi legali li jolqtu s-sorveljanza tal-infrastrutturi u l-arranġamenti għall-ħlasijiet, l-ikklerjar u s-saldu ta’ titoli.
Taġixxi bħala katalista għall-bidla, billi tippromwovi sistemi ta’ ħlas effiċjenti u, fil-qasam tal-ħlasijiet bl-imnut, tikkontribwixxi għall-implimentazzjoni taż-Żona Unika ta’ Pagamenti bl-Euro. Taħdem ukoll favur suq tat-titoli effiċjenti billi trawwem l-armonizzazzjoni tal-istandards tas-suq u tħeġġeġ it-tneħħija tal-ostakli għall-integrazzjoni.