6.7.2013   

MT

Il-Ġurnal Uffiċjali tal-Unjoni Ewropea

L 187/17

(1)

Id-Deċiżjoni BĊE/2013/17 tal-21 ta’ Ġunju 2013 dwar l-ishma ta’ persentaġġ tal-banek ċentrali nazzjonali fl-iskema għas-sottoskrizzjoni tal-kapital tal-Bank Ċentrali Ewropew (1) tipprovdi għall-aġġustament tal-ippeżar assenjat lill-banek ċentrali nazzjonali (BĊNi) fl-iskema għas-sottoskrizzjoni tal-kapital tal-Bank Ċentrali Ewropew (BĊE) (minn hawn ‘il quddiem l-‘ippeżar fl-iskema tal-kapital’ u l-‘iskema tal-kapital’ rispettivament) minħabba d-dħul tal-Kroazja fl-Unjoni Ewropea u li l-bank ċentrali nazzjonali tagħha (BĊN), Hrvatska narodna banka, jingħaqad fis-Sistema Ewropea tal-Banek Ċentrali (SEBĊ) fl-1 ta’ Lulju 2013. Dan l-aġġustament jeħtieġ illi l-Kunsill Governattiv jiddetermina t-termini u l-kundizzjonijiet għal trasferimenti ta’ ishma fil-kapital bejnil-BĊNi li huma membri tas-SEBĊ fit-30 ta’ Ġunju 2013 sabiex jiġi żgurat illi t-tqassim ta’ dawn l-ishma jikkorrispondi għall-aġġustamenti magħmula. Bl-istess mod, hija meħtieġa l-adozzjoni ta’ deċiżjoni ġdida li tħassar id-Deċiżjoni BĊE/2008/25 tat-12 ta’ Diċembru 2008 li tistabbilixxi t-termini u l-kundizzjonijiet għat-trasferimenti tal-ishma fil-kapital tal-Bank Ċentrali Ewropew bejn il-banek ċentrali nazzjonali u għall-aġġustament tal-kapital imħallas (2) b’effett mill-1 ta’ Lulju 2013.

(2)

Hrvatska narodna banka mhijiex ser tingħaqad mas-SEBĊ sal-1 ta’ Lulju 2013, li jfisser illi t-trasferiment ta’ kapital bis-saħħa tal-Artikolu 28.5 tal-Istatut tas-SEBĊ ma japplikax għaliha f’din l-okkażjoni.

(3)

Id-Deċiżjoni BĊE/2013/19 tal-21 ta’ Ġunju 2013 dwar il-ħlas fil-kapital tal-Bank Ċentrali Ewropew mill-banek ċentrali nazzjonali ta’ Stati Membri li l-munita tagħhom hija l-euro (3) tiddetermina kif u sa liema punt il-banek ċentrali nazzjonali tal-Istati Membri li l-munita tagħhom hija l-euro (minn hawn ‘il quddiem “BĊNi taż-żona tal-euro”) huma taħt obbligu biex iħallsu l-kapital tal-BĊE minħabba l-iskema tal-kapital estiża. Id-Deċiżjoni BĊE/2013/20 tal-21 ta’ Ġunju 2013 dwar il-ħlas fil-kapital tal-Bank Ċentrali Ewropew mill-banek ċentrali nazzjonali li mhumiex fiż-żona tal-euro (4) tiddetermina l-persentaġġ illi l-banek ċentrali nazzjonali tal-Istati Membri li l-munita tagħhom mhijiex l-euro (minn hawn ‘il quddiem ‘BĊNi li mhumiex fiż-żona tal-euro’) huma taħt obbligu illi jħallsu b’effett mill-1 ta’ Lulju 2013 minħabba l-iskema tal-kapital estiża.

(4)

Il-BĊNi taż-żona tal-euro diġà ħallsu l-ishma tagħhom fil-kapital sottoskritt tal-BĊE kif mitlub skont id-Deċiżjoni BĊE/2010/27 tat-13 ta’ Diċembru 2010 dwar il-ħlas taż-żieda fil-kapital tal-BĊE mill-banek ċentrali nazzjonali ta’ Stati Membri li l-munita tagħhom hija l-euro (5). Minħabba dan, l-Artikolu 2(1) ta’ Deċiżjoni BĊE/2013/19 jistipula illi l-BĊNi taż-żona tal-euro għandhom jew jittrasferixxu ammont addizzjonali lill-BĊE, jew jirċievu ammont lura mingħand il-BĊE, skont il-każ, sabiex jaslu għall-ammonti murija fit-tabella fl-Artikolu 1 tad-Deċiżjoni BĊE/2013/19. Id-Deċiżjoni BĊE/2010/27 tissupplimenta d-Deċiżjoni BĊE/2008/24 li tistabbilixxi l-miżuri neċessarji għall-ħlas tal-kapital tal-Bank Ċentrali Ewropew mill-banek ċentrali nazzjonali parteċipanti (6).

(5)

Bl-istess mod, il-BĊNi li mhumiex fiż-żona tal-euro, bl-eċċezzjoni ta’ Hrvatska narodna banka, diġà ħallsu persentaġġ tal-ishma tagħhom fil-kapital sottoskritt tal-BĊE kif mitlub fid-Deċiżjoni BĊE/2010/28 tat-13 ta’ Diċembru 2010 dwar il-ħlas taż-żieda fil-kapital tal-BĊE mill-banek ċentrali nazzjonali li mhumiex fiż-żona tal-euro (7). Minħabba dan, l-Artikolu 2(1) ta’ Deċiżjoni BĊE/2013/20 jistipula illi kull wieħed minnhom għandu jew jittrasferixxi ammont addizzjonali lill-BĊE, jew jirċievi ammont lura mingħand il-BĊE, skont il-każ, sabiex jasal għall-ammonti murija fit-tielet kolonna tat-tabella fl-Artikolu 1 tad-Deċiżjoni BĊE/2013/20. L-Artikolu 2(2) tad-Deċiżjoni BĊE/2013/20 jistipula illi Hrvatska narodna banka għandu jittrasferixxi lill-BĊE l-ammont muri ħdejn ismu fit-tielet kolonna tat-tabella fl-Artikolu 1 tal-istess Deċiżjoni,