(1) L-ABS ikollhom valutazzjoni tal-kwalità tal-kreditu li tkun konformi ma', bħala minimu, il-pass 3 tal-kwalità tal-kreditu fl-iskala ta' klassifikazzjoni armonizzata tal-Eurosistema ( 1 ), espressa fil-forma ta' mill-inqas żewġ klassifikazzjonijiet ta' kreditu pubbliċi pprovduti minn kwalunkwe żewġ Istituzzjonijiet Esterni ta' Valutazzjoni tal-Kreditu (External Credit Assessment Institutions — ECAIs) aċċettati fi ħdan il-Qafas ta' Valutazzjoni tal-Kreditu tal-Eurosistema (Eurosystem Credit Assessment Framework — ECAF).

(2) Minbarra kif huwa pprovdut fil-punt 1 iktar 'il fuq u l-punt 9 iktar 'l isfel, l-ABS jissodisfaw il-kriterji tal-eliġibbiltà applikabbli għall-ABS sottomessi bħala kollateral għal operazzjonijiet tal-politika monetarja tal-Eurosistema kif stipulat fil-Linja Gwida BĊE/2014/60 ( 2 ).

(3) Meta l-ABS ma jkollhomx valutazzjoni tal-kwalità tal-kreditu b'mod konformi ma' tal-inqas il-pass 2 tal-kwalità tal-kreditu fl-iskala ta' klassifikazzjoni armonizzata tal-Eurosistema, espressa fil-forma ta' mill-inqas żewġ klassifikazzjonijiet tal-kreditu pubbliċi pprovduti minn kwalunwe żewġ ECAIs aċċettati fi ħdan l-ECAF, l-ABS għandhom, minbarra li jissodisfaw ir-rekwiżiti tal-punt 2, jissodisfaw il-kriterji ta' eliġibbiltà applikabbli għall-ABS sottomessi bħala kollateral għal operazzjonijiet tal-politika monetarja tal-Eurosistema skont l-Artikolu 3 tal-Linja Gwida BĊE/2014/31 ( 3 ).

(4) Mhux inqas minn 90 % tal-obbliganti tal-assi li jiġġeneraw fluss ta' flus li jiggarantixxu l-ABS huma kklassifikati bħala korporazzjonijiet mhux finanzjarji tas-settur privat ( 4 ) jew persuni fiżiċi, imkejla b'referenza għall-ammont prinċipali pendenti tal-assi li jiġġeneraw fluss ta' flus attribwibbli għal dawk l-obbliganti.

(5) Mhux inqas minn 95 % ta':

(a) l-ammont prinċipali pendenti tal-assi li jiġġeneraw il-fluss ta' flus li jiggarantixxu l-ħruġ tal-ABS huwa ddenominat f'euro;

(b) kwalunkwe proprjetajiet li jiggarantixxu l-assi li jiġġeneraw fluss ta' flus li jiggarantixxu ħruġ ta' ABS ta' titoli residenzjali ggarantiti b'ipoteka (residential mortgage-backed securities -RMBS) jew titoli kummerċjali ggarantiti b'ipoteka (commercial mortgage-backed securities -CMBS) jinsabu fiż-żona tal-euro, imkejla b'referenza għall-ammont prinċipali pendenti tal-assi li jiġġeneraw fluss ta' flus attribwibbli għal dawk il-proprjetajiet; u

(c) l-obbliganti tal-assi li jiġġeneraw fluss li jiggarantixxu l-ħruġ tal-ABS (minbarra ħruġ ta' ABS li jikkonsistu f'RMBS u CMBS kif deskritt taħt il-punt (b)), imkejla b'referenza għall-ammont prinċipali pendenti tal-assi li jiġġeneraw fluss ta' flus attribwibbli għal dawk l-obbliganti, huma inkorporati jew residenti, skont kif applikabbli, fiż-żona tal-euro.

(6) L-emittent tal-ABS ikun stabbilit fiż-żona tal-euro.

(7) Segment ta' ABS (bl-istess Numru Internazzjonali ta' Identifikazzjoni tat-Titoli (ISIN) jew wieħed funġibbli) li, fil-ħin meta jkun ivvalutat mill-BĊE għal xiri potenzjali skont l-Artikolu 3, kien miżmum bis-sħiħ mill-oriġinatur jew entitajiet li magħhom ikollu rabtiet mill-qrib ( 5 ) għandu jkun eliġibbli għal xiri taħt l-ABSPP jekk investitur estern mingħajr rabta mill-qrib mal-oriġinatur (bl-eċċezzjoni ta' bank ċentrali tal-Eurosistema li jaġixxi barra l-qafas tal-ABSPP) jixtri wkoll parti minn dak is-segment ta' ABS (bl-istess ISIN jew wieħed funġibbli).

(8) Meta l-obbliganti tal-assi li jiġġeneraw fluss ta' flus li jiggarantixxu ħruġ ta' ABS ikunu inkorporati jew residenti fil-Greċja jew f'Ċipru, il-livell ta' klassifikazzjoni minimu stipulat fil-punt 1 ma għandux japplika għal dawk l-ABS sakemm ikunu soġġetti għal-limitu ta' xiri speċifikat fl-Artikolu 5(2) u jkunu jissodisfaw il-kriterji l-oħrajn kollha ta' eliġibbiltà li jkunu applikabbli għal xiri taħt l-ABSPP u dawn ir-rekwiżiti addizzjonali kollha segwenti:

(a) il-livell minimu ta' kwalità tal-kreditu tal-Eurosistema użat sabiex tiġi ddeterminata l-eliġibbiltà bħala kollateral ta' strumenti ta' dejn negozjabbli maħruġin jew iggarantiti mill-gvernijiet tal-Greċja jew ta' Ċipru ma jkunx applikat skont l-Artikolu 8(2) tal-Linja ta' Gwida BĊE/2014/31;

(b) l-ABS ikollhom żewġ klassifikazzjonijiet ta' kreditu pubbliċi minn kwalunkwe żewġ ECAIs aċċettati fi ħdan l-ECAF fil-livell ta' klassifikazzjoni massimu li jista' jinkiseb għal ħarġiet ta' ABS fl-Istat Membru relevanti;

(c) l-istruttura tal-ħruġ ta' ABS tinkorpora titjib tal-kreditu attwali (bħat-titjib tal-kreditu pprovdut mis-segmenti kollha tal-ħruġ tal-ABS li huma subordinati għas-segment tal-ABS eliġibbli għax-xiri) ugwali għal minimu ta' 25 % tal-ammont prinċipali attwali pendenti tas-segmenti kollha tal-ħruġ tal-ABS;

(d) rapporti tal-investituri jkunu disponibbli u l-ABS ikunu jistgħu jiġu mmudellati bl-użu ta' għodod standard minn terzi għall-immudellar tal-fluss tal-flus ta' ABS, kif ivvalutati mill-BĊE;

(e) l-aqwa valutazzjoni tal-kwalità tal-kreditu disponibbli għal kull waħda mill-kontropartijiet segwenti fil-ħruġ tal-ABS (jekk relevanti), bl-eċċezzjoni tas-servizzjant, tkun konformi bħala minimu mal-passi 3 tal-kwalità tal-kreditu fl-iskala ta' klassifikazzjoni armonizzata tal-Eurosistema, espressa fil-forma ta' mill-inqas klassifikazzjoni ta' kreditu pubblika waħda minn kwalunkwe ECAI individwali aċċettata fi ħdan l-ECAF:

(i) kwalunkwe kont bankarju emittenti;

(ii) kwalunkwe kont bankarju emittenti garanti;

(iii) kwalunkwe fornitur ta' faċilità ta' likwidità;

(iv) kwalunkwe kontroparti f'ħeġġ;

(v) l-aġent prinċipali li jħallas; u

(vi) kwalunkwe fornitur ta' kuntratt ta' investiment iggarantit.

(f) servizzjant sostitut għall-ħarġa tal-ABS ikun ġie appuntat.

(9) Ir-rekwiżiti stipulati fl-Artikolu 77 tal-Linja Gwida BĊE/2014/60 ma għandhomx japplikaw għal segmenti intermedji ta' ABS li jkunu eliġibbli biss għal xiri taħt l-ABSPP jekk ikunu:

(a) iggarantiti b'garanzija:

(i) li tissodisfa r-rekwiżiti għal garanziji ta' assi negozjabbli kif stipulat fl-Artikoli 114, 115, 117 u 118 tal-Parti Erbgħa, Titolu IV tal-Linja Gwida BĊE/2014/60; u

(ii) maħruġa minn garanti b'valutazzjoni tal-kreditu skont l-Artikolu 83(c) tal-Linja Gwida BĊE/2014/60 u pprovduta minn ta' mill-inqas sistema ECAI aċċettata waħda, espressa fil-forma ta' klassifikazzjoni ta' kreditu pubblika, f'konformità, bħala minimu, mal-pass 3 tal-kwalità tal-kreditu fl-iskala ta' klassifikazzjoni armonizzata tal-Eurosistema; u

(b) jissodisfaw il-kriterji l-oħrajn kollha ta' eliġibbiltà applikabbli għal xiri taħt l-ABSPP.

(a) tkun ikklassifikata taħt is-segment jew subsegmenti mhux subordinati tal-istess ħruġ ta' ABS kif stipulat fl-Artikolu 77 tal-Linja Gwida BĊE/2014/60; u

(b) tkun ikklassifikata 'l fuq mis-segment l-aktar subordinat jew subsegmenti li jkunu l-ewwel li jbatu telf imġarrab fuq l-iskoperturi titolizzati u li b'hekk jipprovdu protezzjoni lit-tieni telf u, fejn relevanti, segmenti jew subsegmenti ta' grad aktar għoli.

(10) Huma permessi xirjiet ta' ABSs nominali b'rendiment negattiv sal-maturità (jew rendiment għall-agħar) ugwali għal jew 'il fuq mir-rata tal-faċilità ta' depożitu. Huma permessi sal-grad meħtieġ xirjiet ta' ABSs b'rendiment negattiv sal-maturità (jew rendiment għall-agħar) taħt ir-rata tal-faċilità ta' depożitu.

(11) L-entità li oriġinat jew stabbilixxiet ABS mhijiex entità, kemm jekk tkun proprjetà pubblika jew privata, li: (i) ikollha bħala l-iskop ewlieni tagħha l-iżvestiment gradwali tal-assi tagħha u l-waqfien tan-negozju tagħha; jew (ii) tkun entità għall-ġestjoni jew l-iżvestiment ta' assi stabbilita biex tappoġġa ristrutturar u/jew riżoluzzjoni tas-settur finanzjarju, inklużi vetturi tal-ġestjoni tal-assi li jirriżultaw minn azzjoni ta' riżoluzzjoni fil-forma tal-applikazzjoni ta' għodda għas-separazzjoni tal-assi skont l-Artikolu 26 tar-Regolament (UE) Nru 806/2014 tal-Parlament Ewropew u tal-Kunsill ( 6 ) jew leġiżlazzjoni nazzjonali li timplimenta l-Artikolu 42 tad-Direttiva 2014/59/UE tal-Parlament Ewropew u tal-Kunsill ( 7 ).