26.1.2010   

MT

Il-Ġurnal Uffiċjali tal-Unjoni Ewropea

C 19/1

1.1.

Il-BĊE jilqa’ l-għan li tissaħħaħ il-protezzjoni tal-investitur, billi jkun hemm informazzjoni fil-prospetti li tkun iktar sempliċi u faċli biex tinqara. B’mod partikolari għal titoli inqas standardizzati, bħal titoli sostnuti minn assi, u għal tipi oħrajn ta’ titoli sostnuti b’garanziji, b’mod partikolari bonds koperti, sommarju mfisser tajjeb li jinkludi informazzjoni ewlenija fuq it-titoli kif ukoll fuq il-partijiet involuti, u sistema komprensiva ta’ responsabbiltà dwar l-informazzjoni fis-sommarju, ikunu utli għall-investituri u r-regolaturi biex tiġi żgurata l-paragunabbiltà mhux biss bejn il-klassijiet tal-assi imma wkoll bejn it-titoli ġewwa l-klassijiet ta’ assi.

1.2.

F’dan ir-rigward, il-BĊE jilqa’ b’ħeġġa d-djalogu kurrenti bejn il-BĊE, l-awtoritajiet kompetenti u l-industrija fuq il-possibbiltà li jinħoloq standard għal data ta’ referenza fuq titoli u min jagħmel il-ħruġ, bil-għan li din id-data tkun disponibbli għal min ifassal il-politika, ir-regolaturi u s-swieq finanzjarji permezz ta’ infrastruttura pubblika internazzjonali. Infrastruttra bħal din tipprovdi lill-partijiet interessati kollha b’data ta’ kwalità għolja meħtieġa biex tipproduċi analiżi iktar f’waqthom u analiżi affidabbli ta’ swieq finanzjarji dejjem iktar kumplessi, speċjalment fi żmien ta’ taqlib (3).

2.1.

Id-Direttiva 2003/71/KE (4), id-Direttiva 2004/109/KE (5) u leġislazzjoni oħra tal-UE (6) fihom diversi rekwiżiti dwar l-iżvelar għall-benefiċċju tas-swieq u l-protezzjoni ta’ investituri. Uħud minn dawn id-Direttivi jipprovdu għal eċċezzjonijiet għar-regoli ta’ żvelar. B’mod partikolari, skont l-Artikolu 8(2) tad-Direttiva 2003/71/KE: ‘L-awtorità kompetenti tal-Istat Membru tal-post tista’ tawtorizza l-ommissjoni mill-prospett rigward ċertu tagħrif ipprovdut f’din id-Direttiva jew fil-miżuri ta’ implimentazzjoni riferiti fl-Artikolu 7(1), jekk tikkunsidra li: (a) l-iżvelar ta’ dan it-tagħrif ikun kuntrarju għall-interess pubbliku’. L-ebda eċċezzjoni simili ma hija pprovduta fid-Direttiva 2004/109/KE.

2.2.

Għandu jiġi stabbilit qafas legali ċar biex jiffaċilita t-tmexxija bla xkiel u mgħaġġla tal-operazzjonijiet ta’ self jew ta’ faċilitajiet oħra ta’ likwidità ta’ banek ċentrali, inkluż f’sitwazzjonijiet ta’ kriżi, kif enfasizzat il-kriżi finanzjarja riċenti. F’dan ir-rigward, huwa meħtieġ li informazzjoni dwar is-self jew faċilitajiet oħra ta’ likwidità ta’ banek ċentrali mogħtija lil istituzzjoni ta’ kreditu partikolari, inkluża assistenza ta’ likwidità ta’ emerġenza, tinżamm kunfidenzjali biex tikkontribwixxi għall-istabbiltà tas-sistema finanzjarja in ġenerali u biex tinżamm il-kunfidenza tal-pubbliku f’perijodu ta’ kriżi. L-eċċezzjoni msemmija iktar ’il fuq taħt l-Artikolu 8(2)(a) tad-Direttiva 2003/71/KE tista’ konċepibbilment tintuża bħala bażi legali biex ma jkunx hemm żvelar ta’ xi informazzjoni dwar l-operazzjonijiet ta’ self tal-banek ċentrali, inkluża l-assistenza ta’ likwidità ta’ emerġenza. Madankollu, eċċezzjoni għall-obbligi ta’ żvelar għandha tkun espliċita fil-leġislazzjoni rilevanti kollha tal-UE. Barra minn hekk, il-funzjonament bla xkiel tas-sistema finanzjarja jeħtieġ eċċezzjoni ċara, billi analiżi tal-ħtieġa għal żvelar għal kull każ tista’ toħloq nuqqas ta’ ftehim f’sitwazzjoni fejn hemm bżonn ta’ azzjoni mgħaġġla. Għal dawn ir-raġunijiet, qed isiru proposti għal emendi tad-Direttivi 2003/71/KE u 2004/109/KE fl-Anness u emendi korrispondenti għandhom jiddaħħlu fil-leġislazzjoni rilevanti kollha tal-UE li tipprovdi għal rekwiżiti ta’ żvelar.

2.3.

Il-BĊE huwa lest li jikkoopera iktar mal-Kummissjoni fuq din il-kwistjoni.